रंगीलो राजस्थान

कैर, सांगरी, फळी, फोफळया, राबोडी रो साग जी,
मोठ, बाजरो, ज्वार, जौं, चणां म्है जीमां धन भाग जी,

गोरा धोरा रात च्यानणी फड पाबूजी ख्यात जी,
कूंचां कूचां अळगोजा गीदड अर चंग री थाप जी,

तीज तिवारां गिणगौरा रा कितरा करां बखा
धन धन धरती राजस्थान।

पदमण री जौहर ज्वाला आ वीर भौम चित्तौड री
मीरा-गिरधर भगती भावां माणक माथै मोड री

रामू-चनणा, ढ़ोला-मारू सोरठडी अर नाग जी
राम स्नेही जसनाथी दादू पीपा रैदास जी

भगती प्रेम त्याग भावा सूं वारां तन मन प्राण
धन धन धरती राजस्थान।
धन धन धरती राजस्थान।